Tabernen arteko mozorro lehiaketako sariak Egiburuberri eta Kelly’s-entzat izan dira. Guztira 12 izan dira inauterietako lehiaketa honetan parte hartu dutenak: Xera, Touring, Kelly’s, Landare, Irrintzi, Zuzen, Txokolate 50, Sindikato, Egiburuberri, Arkaitza, Gamon eta Aker.
Egiburuberri izan da arte ederretan aditu talde batek osatutako epaimahaiak aukeratu duena. Eta ondorioz, 700 euro jasoko ditu 2017 urteko inauterietan taberna mozorrotzeko materiala erosteko laguntza moduan. Epaimahaikideen esanetan, “Egiburuberrik ‘Pantaila handitik kalera’ gaiaren lanketa egokia egin du”. Gainera, aukeratutako “Priscila” filmaren egokitzea eta lanketa ona dela iritzi diote: “elementu desberdinen diseinua, tabernako barruko eta kanpoaldeko dekorazioak… Bestalde, bertako langileen jarrera, mozorro eta interpretazioak tabernako girotze lanean asko lagundu duela adierazi nahi dugu eta baita txalotu ere”.
Herri saria
Herritarrek ere izan dute taberna bat hautatzeko ardura. Horretarako inauteri egunetan Herri Bizian botoa emateko aukera egon da. Denera 1.195 boto jaso dira. Horietatik, boto gehien Kelly’s tabernak jaso du: 439 boto (% 36,7). Kasu honetan, 300 euroko saria jaso dute datorren urteko inauterietako mozorroa prestatzen laguntzeko.
Parte hartu duten taberna guztien argazkiak: