Azken urteotan hondakinen inguruan hainbat ekimen burutu ditu Udalak, lege esparru berriei egokitu eta gizartearen behar berriei erantzuna eman asmoz, besteak beste: Hiri-hondakinen Prebentzio-plana onartzea, hondakin organikoa gaika jasotzekoa, etab. Jarduera horiek gauzatzeak Udala eta udalerria errealitate berri batean kokatzen dituela eta, ahalik eta modu egokienean txertatuko badira, hondakinen udal-esparrua arautzen duen erregelamendua ere errealitate beri horretara egokitu beharraren garrantzia azpimarratu du Udalak.

Izan ere, Errenteriako Zaborren eta hiri-hondakin solidoen kudeaketarako Udal-ordenantza (2007an izan zuen azken aldaketa) zaharkitua geratu da eta berau eguneratzeko erabakia hartu du Udal-gobernuak. Hiri-hondakinen Udal-ordenantza berria osatzeko, ordea, ezinbestekotzat jotzen du Udalak herriko eragileak informatu eta hauen ekarpenak kontuan hartzea. Hori dela-eta, udalerriko hainbat eragilerekin partaidetza-saioak burutu ditu Udalak azken asteetan. Dagoeneko Errenteriako honako eragileekin elkartu da Udala: taberna, jatetxe eta ostalariak; elkarteak eta elkarte gastronomikoak; supermerkatu handiak; fruta eta barazki dendak; auzo-elkarteak.

Landa eremuak dituen berezitasunak direla-eta, bertan kokatutako taberna eta jatetxeekin ere bilera berezitua egin nahi du Udalak. Horretarako, Errenteriako landa-eremuan kokatutako taberna eta jatetxeei datorren uztailaren 5ean (asteartea), goizeko 09:00etan, Udaletxeko 1. solairuko  bilera-gelan izango den bilerara hurbiltzeko gonbita luzatu die.

Zalantzari izanez gero, 943 449 603 edo ingurumena@errenteria.eus helbidera zuzen daitezke interesatuek.