Maiatzaren 18an izango da konpostaje-guneetako hurrengo jarraipen-bisita

KonpostaGuneErrent2Ostegunean, maiatzak 18, Errenterian kokatutako auzo-konposta egiteko guneetara hileroko jarraipen-bisita egingo du Udalak. Lanok Errenteriako Udalak bultzatutako konpostaje-programaren baitan kokatzen dira eta, bertan parte hartzen duten herritarrei, dela auzokonposta egiten nola etxeko konposta egiten, zaborraren tasan %30eko hobaria aplikatzen zaie.

Ikuskaritza-lanak gauzatzen dituen lantaldeko kideak 15:00etan abiatuko dira Fanderiako gunetik eta, aurreko jarraipen-bisiten antzera, honakoa izango da ibilbidea: Fanderia, Agustinak, Gaztaño eta Alaberga (azken gune honetako ikuskaritzaz gain, auzoan kokatutako Uztargi haur-eskolan dagoen konpostatze-puntuaren jarraipena ere egiten du enpresak). Ikuskaritza hau erabiltzaileek izan ditzaketen zalantzak eta kezkak argitzeko ere baliatu nahi du lantaldeak. Erabiltzaileren batek ikuskaritzako teknikariarekin hitzordua finkatu nahiko balu, 628-532-303 telefonora deitu edo whatsApp bat bidali dezake, edo, bestela, ondorengo epostara idatzi, hurrengo astelehena baino lehen:auzokonpostae@errenteria.eus.

Era berean, oraindik auzo-konposta egiten ez duten eta parte hartzeko interesa duten herritarrek, goian aipatutako bideak erabil ditzakete Izadi 21 aholkularitza-enpresarekin harremanetan jartzeko.

Etxean konposta egiten duten herritarrei ere aholkularitza eta laguntza zuzena eskaintzen die Udalak, konposta egiteko orduan sor daitezkeen zalantzei erantzunez eta intzidentzien inguruko informazioa jasoaz. Erabiltzaileek zalantzak izanez gero, honako posta elektronikora idatz dezakete: etxekonpostae@errenteria.eus.

Alabergan konposta atera berri dute

Maiatzaren 3an Alabergan kokatutako auzo-konposta gunetik konposta atera zuten bertako erabiltzaileek Udalaren aholkularitza-taldearen laguntzaz. Hainbat hilabeteetan zehar metatutako biohondakinak konpost bihurtu ondoren, 700 litrotako edukiera duen konpostagailua hustu eta, bahearen laguntzaz, baratzean erabiltzeko pronto utzi zuten heldutako konposta. Egun hartan ateratako konpost guztia bertan parte hartu zuten kideek eraman zuten, baratzean erabiltzeko.

KonpostAterAlabergaWEB