Asteburu honetan ez da zer eginik faltako Alabergan. Festak, ofizialki datorren asteburuan izango badira ere (maiatzaren 27tik 29ra) berrikuntza moduan, igande honetarako bi ekimen antolatu dituzte “giroa berotzen joateko”: Batetik, txirrinda jolasak haurrentzat eta gazteentzat, 11:00etatik 13:00etara, Gurpilarte elkartearen laguntzarekin. Eta jarraian, 13:00etan, vermutada, jazz doinupean. Bi ekintzok auzoko plazan izango dira.
Bestalde, datorren asteko jaietako auzo afarian izena emateko egunak, bihar eta etzi izango dira (maiatzak 19 eta 20) 19:00etatik 20:00etara, auzo elkartearen lokalean; eta igandean (maiatzak 22an) leku berean, 12:00etatik 14:00etara. Azkenik, auzo elkarteak jakinarazi du haur danborradaren lehen entsegua ostiral honetan egingo dela, 18:30ean, auzoko plazan.