• Bekaren helburua da ekarpen ekonomikoa egitea pazientearen diagnostikoa, jarraipena eta tratamendua hobetzen lagunduko duen proiektu bati

Juneren Hegoak elkarteak eta Euskal Herriko Pediatria Elkarteak III. June Sánchez Tolaretxipi Bekaren deialdia egin dute. Ekimen honen helburua da haur-onkologiako ikerketa-proiektu bati finantza-laguntza ematea, diziplina horrekin zerikusia duen edozein arlotan, eta paziente-talde horren diagnostikoan, jarraipenean eta tratamenduan hobekuntzak egiten lagunduko duena. Aurten 3.000 €-ko ekarpena egingo da.

Gaur egun, GKE honek laguntza-sare bat sortzen du zaurgarritasun-egoeran dauden Gipuzkoako familientzat, haur gaixo bat izatearen esperientzia bizi dutelako edo seme-alabak galtzearen doluari aurre egin behar diotelako. Era berean, bere eginkizun bera duten beste erakunde batzuekin elkarlanean aritzen da, eta, ikerketaren bidez, haurren gaixotasunen aurkako borrokan irmoki sinesten du.

June txikia, elkarte hau sortu zuena, neuroblastoma baten ondorioz hil zen. Haurtzaroan izaten den garezurretik kanpoko tumore solido ohikoena da, portaera-espektro zabalarekin, hau da, bat-bateko erregresioa eta tumore onberarekiko bereizketa, tumore metastasiko oso oldarkorrak eta hilkortasun handikoak. Beraz, beka hau sortzeak bi helburu ditu: batetik, June omentzea eta gogoratzea, eta, bestetik, haurren minbiziaren ikerketa bultzatzea, minbizia duten haurren eta haien familien bizitza hobetzeko, eta, horrela, GKEaren hiru helburu nagusietako bigarrena betetzea, hau da, haurren gaixotasunen aurka borrokatzea (lehena familiei laguntzea eta orientazioa ematea da, eta hirugarrena, berriz, haurren gaixotasunen errealitatea gizarteari oro har hurbiltzea.

Juneren Hegoak elkarteak honako hau adierazi du: “Nahiz eta gaur egun egoera ekonomiko zaila bizi dugun elkartean, ahalegin bat egin nahi izan dugu, ekimen honen hirugarren edizio bat bultzatuz, aurreko edizioekin bat datorren ekarpen ekonomiko batekin. Gure ustez, beharrezko ekintza da, pandemiak ikerketa-proiektuak abian jartzean eta garatzean sortzen dituen zailtasunak kontuan hartuta. Uste dugu ikerketarik gabe ez dagoela itxaropenik, eta itxaropenik gabe ez dagoela etorkizunik”.

Hautagaitza bat aurkezteko beharrezkoa da Euskal Herriko Pediatria Elkarteko bazkide izatea eta gutxienez bi urtez pediatriako zentro batean lan egin izana justifikatzea, bertako zuzendaritzaren ziurtagiri baten bidez. Eskaerak jasotzeko epea 2021eko uztailaren 1ean amaituko da, 23:59an.

Juneren Hegoak eta Euskal Herriko Pediatria Elkarteak jatorria, pronostiko faktoreak eta tratamendua ikertzen dituzten proiektuak baloratuko dituzte, bai eta paziente onkologikoen bizi-kalitatea hobetu eta onurak ekar ditzaketen teknika diagnostiko edo terapeutikoak ikastera bideratutakoak ere.

2015ean jarri zen martxan June Sánchez Tolaretxipi beka, eta orduan saritu zuten Idoia García Camino doktorea, biomarkatzaileak meduloblastoman identifikatzeari buruz egindako lanagatik. II. beka 2018an eman zitzaien Itziar Astigarraga Aguirre ikertzaileari eta Susana García Obregón biologoari, minbizia duten haur eta nerabeengan infekzio larriak diagnostikatzen dituzten markatzaileen azterketan egindako ikerketa-lerroagatik.