Udala pozik dago etxez etxeko arretako langileen lan-baldintzak hobetu direlako

Ongizatea | Udal komunikabidea 2021-08-03 | 0
  • Udalak hasieratik aurreikusi zuen lizitazioaren orduko prezioa % 11 + KPIa igotzea datozen hiru urteetarako, subrogatutako langileen lan-baldintzak nabarmen hobetuz

Etxez etxeko laguntza-zerbitzua funtsezkoa da udalerriko adineko eta/edo mendeko pertsonen ongizaterako, eta 600 familia inguru artatzen ditu. Duela urte batzuetatik hona apustu irmoa eta estrategikoa egin da zerbitzua kalitatezkoa izan dadin eta, beste udalerri batzuetan gertatzen den bezala, itxaron zerrendarik egon ez dadin.

Zerbitzu hori, zati batean, udal-langileekin ematen da, eta beste zati batean, azpikontratatuta, langile subrogatuekin. Gobernu-taldea langile guztiak udalekoak izatearen aldekoa da, baina iraganean hartutako hainbat erabakik egungo errealitatea baldintzatzen dute eta egoera hori lehengoratzea zailtzen dute, nahiz eta argi dagoen horri heldu beharko zaiola. Bien bitartean, Udalak subrogatutako langileen lan-baldintzak hobetzearen aldeko apustu garbia egin du, uste baitu beharrezkoa dela udal-langileen lan-baldintzen parekoak izatea.

Hori dela eta, orain martxan dagoen lizitazio berriari begira, Udalak hasieratik hartu du konpromisoa langileek proposatutako hobekuntzekin (aurrekontuan aurreikusitako igoerak), baina gehiago kostatu da enpresa eta langileak ados jartzea, langileek eskatzen zituzten indarrean jartzeko bermeei dagokienez.

Hori dela eta, subrogatutako langileek grebara joatea erabaki zuten, enpresa esleipendunak (Arquisocial) hitzarmena indarrean jarriko zela berma zezan eta, beraz, hobekuntzak beranduenez 2022ko urtarrilaren 1ean gauzatuko dira.

Udalak hainbat bilera egin ditu bi aldeekin, lan-gatazkan duen erantzukizunetik bitartekari, ahalik eta konponbide azkarrena bilatzeko, alderdi sozialari hobekuntza ekonomiko eta sozialak bermatuko zizkion blindaje juridiko batekin, eta pozik agertu da greba amaitu delako, hobetzeko helburuak betez.

No comments yet.

Utzi erantzuna