Errenteriako Udalak eta Euskadiko Ferialari Autonomoen Elkargoak, aurten ere, hitzarmena sinatu dute Fanderiako feria eremuko baldintzak adosteko; tartean, atrakzio eta barrakei prezio herrikoiagoak jartzeko.

Hau horrela, haurren bidaiak 2,20 euroko prezioa izango dute eta helduen kasuan, 2,80 eurokoa.

Gainera, barrakek bi egunez prezio bereziak izango dituzte: uztailaren 23an 11:00etatik 14:00etara eta uztailaren 26an egun osoan, bidaia, 1,30 euroren truke erosi ahalko da.

Hitzarmenak bestelako gai teknikoak, ingurugiroari dagozkionak, genero ikuspegiaren ingurukoak, soinuen kontrola… ere lantzen ditu.

Ludoteka eta dutxa zerbitzuak

Ferialarien eta salmenta ibiltaria egiten dutenen 4 urtetik gorako seme-alabentzako, halaber, ludoteka zerbitzua eskainiko du Udalak. Markola ludotekan izango da, uztailaren 22tik 25era, 17:00etatik 19:00etara.

Bestalde, dutxa zerbitzua ere izango da eurentzat, 8:00etatik 11:00etara, Galtzarabordako kiroldegian, uztailaren 20tik 25era, uztailaren 22an salbu. Egun horretan kiroldegia itxita egongo denez, Niessen Kulturgunean izango da horretarako aukera.

Euskararen sustapena

Madalenetan euskararen presentzia indartzeko, gainera, ferialari eta salmenta ibiltaria egiten duten pertsonei, aurten ere, hiztegitxoak banatuko zaizkie. Hiztegi hauez baliatuta, harremanetarako euskarazko oinarrizko hitzak ezagutaraztea da helburua.