Errenteriako Udalak, Merkataritza eta Ostalaritzako Aholku Kontseiluan ordezkatuta dauden hiri-ekonomiako eragileekin lankidetzan, hutsik dauden lokalak eta merkataritza-guneak mobilizatzeko dirulaguntzen lerro berri bat landu du.
Agintaldi honetan formalizatutako Aholku Kontseiluaren xedea da udalerriko Merkataritza Berrindartzeko Plan Bereziaren (PERCO) kudeaketa partekatua egitea Udalaren eta hiri-ekonomiako eragileen artean. Bere ibilbidean ekimen ugari jarri ditu martxan, besteak beste, tokiko kontsumorako bonuen kanpainak edo hainbat dirulaguntza lerro, udalerriko saltokietan, ostalaritza-establezimenduetan eta mikroenpresetan digitalizazioa, energia-eraginkortasuna edo hobekuntza-inbertsioak sustatzera eta laguntzera bideratuak, enplegua eta aberastasuna ematen duen eta udalerri bizia izaten laguntzen duen tokiko ehun ekonomikoa izaten jarrai dezagun.
Dirulaguntzen ildo berri hau merkataritza-guneak biziberritzen laguntzeko sortu da, haien dinamismoa zainduz eta bultzatuz.
Alde batetik, prebentziozko eta aurretiazko neurri gisa, merkataritza-transmisioa bultzatu nahi da, errentagarriak diren eta etorkizuna duten lokalak eta negozioak ixtea saihesteko modu gisa.
Bestalde, negozio berriak instalatzea sustatu nahi da, baita gaur egun pisuetan dauden negozioak kalean dauden lokaletara birkokatzea ere. Horrela, erabilera horretarako etxebizitza gisa pentsatutako espazioak libratzeaz gain, gaur egun itxita dauden merkataritza-lokaletan dagoeneko martxan dauden negozioak berriro irekitzea erraztuko da.
Proposamenaren ezaugarriak
Udalak 200.000 euro bideratuko ditu, hasteko, dirulaguntza honetara.
Dirulaguntza hauen onuradunak izango dira 2022an edo 2023an negozio berri bat abian jarri duten edo jarriko duten mikroenpresak eta norberaren konturako langileak, abian den negozio bat beste norbaiti transmititu dioten edo transmitituko diotenak, edo bere jarduera komertziala kalean dagoen lokal batera birkokatu edo birkokatuko dutenak.
Diruz lagundu daitezkeen kontzeptuak izango dira negozio berria eskualdatzeko eta abian jartzeko hasierako gastuak eta inbertsioak, bai eta hutsik dagoen lokala edo merkataritza-gunea erosteko edo alokatzeko gastuak eta inbertsioak ere, eta eskaera bakoitzeko laguntzaren kopurua 9.600 eurokoa izango da gehienez.
Gobernu Taldeak deialdi honen oinarriak aurkeztu dizkie udaleko gainerako alderdi politikoei, eta aurreikusten da azaroaren amaieratik aurrera aurkeztu ahal izango direla eskaerak, behin oinarriak Gipuzkoako Aldizkari Ofizialean argitaratu ondoren. Beraz, Udalak interesa izan dezaketenak informatzera eta eskaerak aurkeztera animatu ditu.
