Atlantikaldiaren barruan, larunbatean, hilak 24, Gynkhana bat antolatu da, Foru plazan kokatuko den “Usain eta Zaporeen Bidaia” azokan, 16:30etik 18:00etara.
Ekimen honetan parte hartzeko, beharrezkoa izango da aldez aurretik izena ematea atlantikaldia.errenteria.eus webgunean.
7 talde eratuko dira orotara eta izen-ematean bertan, talde horiek proposatu daitezke; beraz, familian, koadrilan edo norbanako bezala ere eman daiteke izena.
Jolasaren funtsa ondorengoa izango da: erdigunean kokatuta dauden Atlantikaldiaren guneetan, 7 pista egongo dira ezkutatuta. Guztiak jaso eta bertan dauden galderak egoki erantzun beharko dira. Ondoren Foru plazara bueltatu beharko dira talde parte-hartzaileak.
Galderak, azoka osatuko duten herrialdeetako kulturaren ingurukoak izango dira: Euskal Herria, Galizia, Maroko, Kolonbia, Nigeria eta Txina.
Gynkhana lehendabiziko postuan amaitzen duen taldeak saria izango du.