Lizitazio-prozesua amaituta, Udalak Iparragirre Eraikuntzak Lanak SL enpresari esleitu dizkio udalerriko erdigunea eta Gaztaño auzoa lotuko dituen hiri-igogailua jartzeko eta urbanizazio osagarria egiteko obrak.

Proiektuak 663.548 €-ko aurrekontua du, eta 6 hilabeteko exekuzio-epea aurreikusten da.

Zehazki, azpiegitura honek 12 metroko desnibela gaindituko du Maria de Lezo eta Zabaleta Anaiak kaleen artean.

Igogailuak 17 pertsona eta 1275 kg-ko karga-edukiera izango du, eta kabinaren neurriak 150 x 190 cm-koak izango dira, hau da, bizikletarekin bateragarria izango da, eta hiriko gainerako igogailuen ordutegi berean funtzionatuko du: goizeko 6:00etatik goizaldeko 1:00etara.

Igogailua eraikitzeaz gain, proiektuak Zabaleta Anaiak 1 eta 2 etxebizitza-blokearen atzean dagoen oinezkoentzako ibilbidea irisgarri bihurtzea aurreikusten du, Altxu kalearekin lotu arte. Horrela, puntu horretatik auzoaren erdialdean eta mendebaldean dauden eraikin gehienei ematen zaie zerbitzua.