Illumbe Akordeoi Orkestrak kontzertua eskainiko du larunbat honetan, martxoaren 16an, Errenteriako Maria Magdalena basilikan. José Juan Zubillagak zuzendutako taldea arratsaldeko 20:00etatik aurrera arituko da, doako sarrerarekin. Orkestrak musika tradizionalez eta La La Land bezalako filmetako soinu-bandez osatutako errepertorioa eskainiko du Maria Magdalenaren Lagunak antolatutako kontzertuan.

Akordeoi orkestretarako obra gutxi egiten direnez, Zubillaga bera arduratu da Pasaiako musika eskolaren parte den orkestraren errepertorioa egokitzeaz. Larunbat honetako egitarautik nabarmentzekoa da Queen-en Bohemian Rhapsody lan osoaren interpretazioa.

Kontsulta ezazu hemen larunbat honetako kontzertuaren egitaraua.

Illumbe Akordeoi Orkestra 1985ean sortu zen, beraz, gertu du 40. urteurrena. Hamasei kidek osatzen dute eta akordeoiak du protagonismo nagusia. Akordeoiak hainbat ahotsetan banatuta daude, koru bat balitz bezala, eta, aldi berean, bi instrumentu elektronikok babesten dituzte: baxu elektrikoa, akordeoi elektronikoa eta beharrezko perkusio guztia.

Idoia Zabaleta orkestrako kideak azaldu duenez, taldeak erabili ohi duen akordeoi klasikoak baditu beste instrumentu batzuen antzeko soinuak emititzeko mekanismoak, hala nola biolina, biola edo klarinetea: “Akordeoiak bere tinbrea duela jakinda, orkestra klasiko batean entzun ditzakegunak dira, eliza-organo eramangarri bat balitz bezala”.

Orain arte, orkestra pasaitarrak Illumbe Akordeoi Orkestra eta Haizeari izeneko bi disko argitaratu ditu, bai eta Estatuan eta nazioartean sari ugari jaso ere.