Joan den apirilaren 23an, Errenteriako Koldo Mitxelena Herri Ikastetxeko Guraso Elkarteak, lehenengo aldiz, Kultura Aniztasunaren festa antolatu zuen. Ikasturtean zehar, Guraso Elkarteak gaiaren inguruko ekintza desberdinak antolatu ditu: hitzaldiak, kulturen arteko topaketak, … eta lan horri guztiari bukaera ona emateko, festa antolatu zuen. Festaren helburua eskola-komunitateak duen kultura aniztasuna ezagutzera ematea izan zen eta elkarren arteko harremanak sendotzea. Familia askok parte hartu zuen festaren antolaketan.

Goiz osoan zehar ekintza asko izan ziren: ipuin-kontaketa 8 hizkuntza desberdinetan, munduko jolasak eta tailerrak, eta munduko 8 txokoetako pintxo-dastaketa. Jende ugari hurbildu zen eta denek, bai txikiek eta bai handiek, gogotsu parte hartu zuten ekintza guztietan. Giro alaia izan genuen eskolako patioan eta egindako lanaren emaitza islatu zen.