Errenteriako Udaleko talde politiko guztien artean adostutako adierazpen instituzionala, emakume batek jasandako eraso sexistaren aurrean

Berdintasuna | Solidarioa | Udal komunikabidea 2019-11-06 | 0

Errenterian emakume batek jasan duen eraso sexistaren aurrean, Errenteriako Udaleko alderdi politikoek, aho batez, ondorengo adierazpen instituzionala adostu dute:

1.- Errenteriako Udalak erabat gaitzesten du larunbatean, azaroak 2, Errenterian gertatu zen erasoa.

2.- Errenteriako Udalak erabateko gaitzespena erakutsi nahi du 2019. urtean Errenterian salatu diren emakumeen aurkako 8 erasoen aurrean, eta zero tolerantzia adierazten du edozein eraso matxistaren aurrean.

3.- Horrelako gertaerak ez ditugu gure jendartean onartzen, eta erakunde, elkarte eta herritarrok lanean jarraituko dugu emakumeok indarkeria matxistarik gabe bizi gaitezen. Halaber, Errenteriako Udalak herritarrak gonbidatzen ditu, eta bereziki gizonezkoak, beren jokabide eta jarrerei arretaz erreparatzera eta edonolako erasoren aurrean jarrera aktiboz jokatzera.

4.- Errenteriako Udalak erasoa jasan duen emakumeari laguntza eskaini dio dagoeneko eta elkartasuna adierazi nahi dio adierazpen honen bidez. Era berean, Udalaren esku dauden eta beharrezko zaizkion baliabide guztiak jarriko ditu erasotua izandako emakumearen eskura.

5.- Udalak bat egiten du eraso hori gaitzesteko Errenteriako Mugimendu Feministak gaur, azaroak 6, arratsaldeko 19:30ean Xabier Olaskoaga plazan deitu duen mobilizazioarekin eta herritarrei bertan parte hartzeko gonbitea luzatzen die.

No comments yet.

Utzi erantzuna