Errenteriako Udalak behin betiko onartu du 56. Sektoreko, hau da, Gamongoako, Hiri Antolamenduko Plan Orokorraren 6. aldaketa puntuala.

Aldaketa horrek behin betiko aldatzen du 2007tik indarrean zegoen antolamendua. Horrela, 19,70 hektarea liberatuko dira, eta horiek udal jabari publiko bihurtuko dira. Azalera eraikigarria % 30 eta eraiki daitezkeen etxebizitzen kopurua murrizteaz gain (102 etxebizitza gutxiago), etxebizitza publikoen ehunekoa % 79,71ra igo da, hau da, guztira 440 etxebizitza. 912 garaje-plaza sortuko dira etxebizitza-eraikinetan, eta 347 aparkaleku berri lurzoru publikoan.

Gainera, Gamongoaren behin betiko onarpenarekin Pekin errekastoa berreskuratzeko prozesua aktibatu da. Jarduketa hori egikaritze-proiektua idaztean hasiko da.

Gamongoa kudeatzeaz arduratzen den organoa bere urteko kudeaketa-planean sartu du proiektu horren prestaketa.

Pekin erreka Barandiaran parkearen antolamenduaren elementu nagusietako bat da. Hori berreskuratzea urrats garrantzitsua da parkearen eraikuntzan aurrera egiteko eta herritarrek Pekin errekaren ibilguaz gozatu ahal izateko.