Negu honetan natura eta landa ondarearen inguruko hainbat lan burutu ditu Udalak udalerriko zenbait eremutan.
Horrela, abenduan, Otraizko bordaren hobekuntza-lanak gauzatu ditu. Borda hau Oiartzungo mugan dago, Añarbe herri-mendiaren barnean (Aiako Harriko Natura Parkea eta Kontserbazio Bereziko Eremuan, zein Natura 2000 Sarean kokatua).
Bestalde, bioaniztasunari lotuta, bi informazio-panel ezarri ditu: bata Igantziko lepoan, Añarbeko baso-hegaztiei buruzkoa; bestea Fanderiako Oiartzun ibaiko meandroan, anfibioentzako hezeguneari lotutakoa.
Azkenik, Arramendiko gizarte-baratza ekologikoen Parkeari lotutako eraikinean hobekuntzak ere garatu ditu Udalak, Gaztaño eta Agustinak auzoen ondoan.