Aizpitarteko kobazuloak Paleolitoa aztertzeko erreferente berri bihurtu dituzten azken aurkikuntzak ezagutzera emateko asmoz, apirilaren 24ean, San Marko egunaren bezperan, Aizpitarte bidegurutzean izeneko erakusketa zabalduko da San Marko gotorlekuan bertan.
Gune berri honek Aizpitarteko kobazuloak barrutik nolakoak diren ezagutzeko aukera emango du, Sailkatutako Kultura Ondasun gisa kalifikatuta daudenak eta ikusleentzat itxita daudenak, aurkitutako labar-pinturak eta -grabatuak babesteko.
Erakusketa publiko guztietan pentsatuz diseinatu da eta informazio-panelak, bideoak, jolasak eta eskulanak konbinatzen ditu.
Erakusketa honek hainbat eragileren lankidetzari esker zabalduko ditu ateak: Errenteriako Udala, Gipuzkoako Foru Aldundia, Oarsoaldea garapen agentzia eta Aizpitarte talde espeleologiko elkartea. Era berean, herriko artisauen laguntza paregabea izan da, erakusketa, jolasak eta eskulanak diseinatzen, apaintzen eta muntatzen lagundu baitute.
Esposizioa gotorlekua irekita dagoen ordutegian egongo da ikusgai, hau da, larunbat eta igandetan 10:00etatik 14:00etara eta 16:00etatik 18:00etara ekainaren 19ra arte, data horretatik aurrera irekiera-egunak zabalduko dira eta.
San Marko gotorlekura familian egindako bisita gidatu berria bezala, hiribilduaren eta eskualdearen historia modu dibertigarrian jorratzen duena, jolasa Oarsoaldea hobeto ezagutzeko komunikazio-elementu gisa erabiliz, erakusketa honek ere, bereziki, haurrengana iritsi nahi du.
San Markoko espazio ludiko-kulturalaren zerbitzu berrien ordutegiak
Aizpitarte bidegurutzean erakusketaz gain, Errenteriako Udalak hainbat zerbitzu berri eskaintzen ditu San Markoko espazio ludiko-kulturalean, aurten Aste Santutik irekita.
Alde batetik, bisita gidatu berria dugu, gotorlekua eta haren ingurunea esploratzera gonbidatzen duena, ez ikuspegi militar batetik, orain arte egin den bezala, baizik eta ikuspegi globalago batetik, bailararen historia eta haren bilakaera hartuz, gaur egungo populazioaren izaera osatu arte. Bisita hori larunbatetan eta igandetan eskaintzen da, 10:00etan eta 16:00etan euskaraz eta 11:00etan eta 13:00etan gaztelaniaz.
Bestetik, familian bisita gidatua dugu, larunbat eta igandetan 12:00etan eta 17:00etan euskaraz eskaintzen dena. Haurrei protagonismoa emanez, baina familian aisialdia bilatuz, behar duenari azalpen txiki bat emango zaio gaztelaniaz, adingabearekin doan pertsonak jolasetan parte hartzeko aukera izan dezan.
Zerbitzu berri horiek martxan jarri zirenetik eskaera oso altua izan da. Hortaz, lekua ziurtatu nahian, gomendagarria litzateke aurretik deitu eta izena ematea turismoa@errenteria.eus helbidera idatziz edo 943 449 638 zenbakira deituz.
Zerbitzu horien erabileran oinarrituta, ordutegiak alda litezke, eskaerara hobeto egokitzeko.
