Hondakinen Prebentziorako Europako Astea urtero ospatzen da Europar Batasun osoan 2022ko azaroaren 19tik 27ra bitartean.

Errenterian urte asko daramatzagu prebentzioa eta hondakinen gaikako bilketa sustatzen. Udalak abian jarritako ekimenei eta herritarren parte-hartzeari esker, gaur egun sortzen diren hiri-hondakinen %60 inguru gaika biltzen dira, ondoren birziklatu eta artatzeko. Materia organikoaren kasuan, 2021ean, Udalak 2.276 tona bildu zituen, modu selektiboan, etxeek, enpresek eta jatetxeek egindako bereizketatik.

Gure udalerriko datuak onak dira eta eskertzekoa da herritarren ahalegina. Hala ere, edukiontzi grisean (errefusa) botatzen diren hondakinen % 40 horietatik gehien-gehienak, % 95 inguru, birziklagarriak eta berreskuragarriak dira, eta gure 39.219 biztanleko udalerrian, urtean tona asko biltzen dira. Ongi birziklatzea guztiontzat onuragarria den bezala, gaizki birziklatzeak herritar guztiei egiten die kalte.

Hondakinak behar bezala bereizteak onura nabarmena dakar ingurumenean, baina eragin ekonomikoa ere badu. Udal-hondakinak kudeatzeko aurreikusitako gastua 5.928.000 eurokoa izango da 2023an, hau da, udal-aurrekontuaren ia % 10a. Eta etxeetan eta enpresetan gaika bereizteak gastu hori nabarmen murrizten laguntzen du. Ideia bat egiteko, gaur goizean egin duten aurkezpenean nabarmendu dute urrian 511.000 kilo hondakin bota direla errefusaren edukiontzietara. Kontuan hartuta kalkulatzen dela % 95 gai birziklagarriak direla, behar bezala bereizi izan balira, 87.000 euro aurreztu zitezkeen hilabete horretan; izan ere, Udalak errefusa tona bakoitzeko ordaintzen duen zenbatekoa handiagoa da materia organikoaren tona bakoitzaren zenbatekoa baino, adibidez.

Udalak konpromiso sendoa du Errenteria garbiago baten alde lan egiteko, eta etengabe ahaleginduko da birziklatze-indizeak hobetzen.

Alde horretatik, Udalak dei berezia egin nahi die hondakinak modu desegokian bereizten dituzten herritarrei, modu aktiboan parte har dezaten gaikako bilketa egokian, arreta berezia jarriz hondakin organikoei, horiek baitira etxean sortzen direnen proportzio handiena ordezkatzen dutenak.

Azkenik, hondakin organikoak behar bezala bereizteko informazio diptikoa bidaltzen ari da etxeetara. Gainera, gogoratu behar da Errenteriako Udalak doan eskaintzen dituela birziklatzeko gainerako baliabideak (poltsa konpostagarriak, kuboa, txartel elektronikoa).