2010az geroztik Oarsoaldeko Euskara Batzordeak eman ohi duen Oarsoarrak Euskararen Saria Lurdes Sistiaga andereño eta euskaltzale sanjuandarrari eta Intxixu Trail eta Lezo-Jaizkibel mendi lasterketei emango diete aurten.

Lurdes Sistiaga sanjuandarra da. Urte luzez euskarazko irakaskuntzan jardun da andereño gisa, irakasle gisa. Pasaia-Lezo Lizeoan irakasle, guraso eta, orain, amona da Lurdes. Euskararen aldeko lana izan da eta da bere bizitzaren ardatza.

Lezo-Jaizkibel mendi lasterketa otsail aldean eta Intxixu trail ekain aldean izaten dira. Biek ala biek euskaraz antolatzen dituzte hasi eta buka lasterketaren joan-etorri guztiak. Antolaketa osoaz gain, eguneko bozgorailuetako mezu eta ohar guztiak euskaraz egiten dituzte, euskarari kirolean normaltasun osoko maila emanez.

Oarsoaldeko lau udalek eta Lau Haizetarak, Oarsoaldeko AEK-k, Oarso Bidasoko Hitzak, Ttur-ttur euskaltzaleon bilguneak eta Errenteriako Udal Euskaltegiak osatutako epaimahaiak sari emate ekitaldian parte hartzera deitu dituzte eskualdeko herritarrak.

Sari-emate ekitaldia azaroaren 30ean izango da, 19:00etan, Merkatuzarren. Ekitaldi irekia izango da, baina komunikazioa@oarsoaldea.eus helbidearen bidez konfirmatu behar da.