Bloco Malagasy 2008an Agua de Coco Fundazioaren Harrera Sozioedukatibo eta Musikaleko Zentroan (CASEM) jaiotako emakume talde artistikoak Errenteria bisitatuko du uztailaren 25ean. Emanaldia Madalenak jaien barruan kokatzen da, ‘Elkartasunaren Tanpadak’ izenburupean. Azken egunari amaiera emateko, kalejira egingo dute 20:00etan abiatuta, Batukada Feministarekin batera.

Batukadak Herriko plazan hasiko du ibilbidea eta erdiguneko kaleetatik igaroko da, ordubetez gutxi gorabehera, Brasilen garatutako “Samba reggae” musika estiloaren erritmoan. Bere errepertorioan, Bloco Malagasyk bere estilo propioa garatu du, Brasilgo erritmo tradizionalak eta Madagaskarreko hegoaldeko erritmoak uztartuz, hala nola Tsapiky eta Kilalaky. Helburua da bizilagun eta bisitari guztiak sentsibilizatzea, musikaren botere eraldatzailearen bitartez, egoera txarrean dauden haurren inguruan, esate baterako Madagaskarreko hegoaldean.

Jarduera hau Errenteriako Udalarekin lankidetzan eta koordinatuta antolatzen da, kulturarteko espazioak sustatzearen alde, kultura-aniztasuna eta lankidetza balioetsiz. Gainera, ikuskizunaren aurretik, kulturarteko elkartrukerako tailerra egingo da Emakumeen Etxean, Batukada Feministarekin; Batukada Feministaren helburua da emakumeen arteko harremanak eta elkartasuna sustatzea, eta autogarapena eta ahalduntze kolektiboa bultzatzea, batukadaren bidez emakumeek kulturan duten parte-hartzea indartuz.

Bloco Malagasyko kide guztiak CASEM-en trebatu dira. Zentro horrek urtero 600 gazte inguru hezten ditu 12 diziplina artistiko eta musikal ezberdinetan, kaleko arriskuetatik aldenduko dituen kalitatezko aisialdi segurua eskainiz. Halaber, ikasketak sustatzen dituzte, eta horretarako, zentroan izena eman duten guztiei eskolatzen laguntzen diete eta eskolarako errefortzua ematen diete.